Dylan sjell “Zërat” në Kënga Magjike 2026, rikthehet pas dy vitesh në festival

Dylan është rikthyer në skenën e “Kënga Magjike” në edicionin e vitit 2026, ku këtë herë prezantohet me këngën “Zërat”, një projekt i shkruar dhe kompozuar nga vetë artisti, ndërsa produksioni i është besuar Jeris Kasos.

Rikthimi i Dylanit në këtë festival vjen pas pjesëmarrjes së tij në “Kënga Magjike” në vitin 2024, kur garoi me këngën “Froni”. Muzika e këtij projekti u realizua nga Dylan dhe Jeris Kaso, ndërsa edhe teksti ishte bashkëpunim mes tyre, me produksion nga Kaso.

Por karriera e Dylanit në muzikë ka nisur shumë më herët. Ai është marrë me muzikë që nga mosha dy vjeç e gjysmë, ndërsa daljen e parë në një festival e pati në “Çelësi i Artë”, ku u vlerësua me çmimin e publikut.

Nga mosha katër deri në 12 vjeç, Dylan ishte pjesëmarrës në festivale të fëmijëve në Shkodër, Tiranë dhe Shkup, duke fituar ndër vite edhe një sërë çmimesh të para.

– YouTube youtu.be

Një prej momenteve të veçanta në fillimet e karrierës së tij ishte 22 prilli i vitit 2011, kur, në moshën vetëm 13-vjeçare, mbajti një koncert recital në Teatrin e Operës dhe Baletit në Tiranë, ku interpretoi këngët e artistes së njohur shqiptare, Vaçe Zelës.

Në vitin 2015, Dilan Reka ishte finalist i edicionit të katërt të “X Factor Albania”, duke u bërë kështu një prej emrave të rinj që tërhoqën vëmendjen e publikut përmes këtij formati muzikor.

Një vit më vonë, në 2016, ai publikoi këngën “Naked”, një projekt në gjuhën angleze me ritme Electronic Dance. Muzika dhe orkestrimi i këngës u realizuan nga producenti maqedonas Darko Dimitrov.

Po atë vit, në dhjetor, Dilan Reka mori pjesë në Festivalin e 55-të të Këngës në RTSH me këngën “Mos Harro”, me të cilën arriti deri në tre vendet e para. Kënga mori gjithashtu vëmendje të madhe nga fansat evropianë dhe u komentua për stilin e saj ndryshe dhe ritmet latine.

Pas disa vitesh në skenën muzikore, në vitin 2022 Dylan solli projektin “So Tu Ma”, të cilin e kishte shkruar dhe kompozuar vetë.

Rrugëtimi i tij vazhdoi edhe në “Kënga Magjike”, ku në vitin 2024 u prezantua me “Froni”, ndërsa dy vjet më vonë rikthehet sërish në këtë skenë me “Zërat”.

Kënga e re përfaqëson një tjetër hap në rrugëtimin e tij artistik, këtë herë me Dylanin në rolin e autorit të muzikës dhe tekstit, ndërsa produksioni i është besuar Jeris Kasos. /Telegrafi/

Written by Admin